Sufi
raz-e-tauhid to kasrat men chhupa hai ai dost
saikdon jalve hain ik jalva-numa hai ai dost
ik zamana yahan divana bana hai ai dost
tere kuche ki hava hosh-ruba hai ai dost
ishrat-e-hasil-e-isyan men kahan vo lazzat
ba-khuda tark-e-gunah men jo maza hai ai dost
surma-e-tur ho ya khak-e-shifa ya iksir
sab se badh kar tiri khak-e-kaf-e-pa hai ai dost
kya karen jaan na de den jo mohabbat vaale
har ada husn ki paigham-e-qaza hai ai dost
tu ne kis aisi nigahon se azal men dekha
aaj tak khauf se dil kaanp raha hai ai dost
qail-e-hashr-o-qayamat to sabhi hain lekin
tere vaade ka yaqin kis ko hua hai ai dost
janta kaun nahin ahd-e-vafa ko tere
vo bhi minjumla-e-andaz-e-jafa hai ai dost
us zamin par kiya karte hain farishte sajde
tere kushton ka jahan khuun baha hai ai dost
gham tire jalvon men ho jaati hain nazren un ki
dekhne valon se tere ye suna hai ai dost
taj-e-khusrav se gharaz us ko na takht-e-jam se
‘afqar’-e-khak-nashin tera gada hai ai dost
Leave a Reply