Fitrat ulaT Ke KHwab Dikhane Diye Gae

fitrat ulaT ke ḳhvab dikhane diye ga.e

gungon ko bad-zabani ke ta.ane diye ga.e

rahat ki pairvi men takalluf ganva diya

angan men ghair log bhi aane diye ga.e

andhon ki bargah men ankhen fuzul thiin

ik sar-burida jism ko shane diye ga.e

ik ret ki jabin pe patthar ki Thokaren

be-ghar musafiron ko Thikane diye ga.e

paani ki maat tishna-labon ko na thi qubul

sad shukr mujh ko ashk bahane diye ga.e

ye asman zamin ki nalain rah gaya

badle men us ko taare ugane diye ga.e

ham tirgi ke saath numayan the bazm men

un ko to un ke ghar se bhi laane diye ga.e

ham pairahan ke taar se bandhe hue vajud

tasbih ke mizaj ko daane diye ga.e

do lashe hi to ghoḌon ke paanv ka rizq the

baaqi to saare lashe uThane diye ga.e

kitne zamane lamhon ki ghaflat se mar ga.e

saa.at ki bandagi ko zamane diye ga.e

bujhte hue charagh ki tabinda raushni

vo raushni ki jis ko churane diye ga.e

sajde miri jabin men rakkhe ga.e magar

ankhon men mujh ko jism basane diye ga.e

‘kazim’ kisi ke gham ki rifaqat ka shukriya

mujh ko bhi kuchh charagh jalane diye ga.e