iztirab-e-shauq men ilham ka dhoka hua
dil jo dhaḌka aap ke paigham ka dhoka hua
baat itni thi ki us ne ik zara pheri thi aankh
aur mujh ko gardish-e-ayyam ka dhoka hua
marhaba husn-e-tasavvur gesuon ki chhanv ka
gham ki tapti dhuup thi aur shaam ka dhoka hua
jazb hain nazron men yuun us husn ki ranginiyan
aankh uThi jis par usi gulfam ka dhoka hua
de rahe the hadiya-e-tabrik vo aghyar ko
aur ‘mubarak’ mujh ko apne naam ka dhoka hua
Leave a Reply