Tere Sae Se Pare Rah Ke Jiya Kaise Karen

tere saae se pare rah ke jiya kaise karen

fasle tai bhi karen ham to bata kaise karen

rog is dil ko laga hai tiri ḳhatir varna

tu nahin hai to bata dil ki dava kaise karen

do ghadi bhar ke liye bhi na raha saath tira

bin tire shahr men ham pas-e-vafa kaise karen

ranj-o-gham ki vo ravani na rahi dil men mire

dil dukhega to bata dil se dua kaise karen

aap ki duniya alag aur alag apna jahan

raste jab na hon manzil pe mila kaise karen

bevafai ka chalan aam hai duniya men ‘kiran’

zindagi bhar ke liye zaḳhm saha kaise karen

Leave a Comment