safed raat ko din ki dhaḌak samajhte hain
charagh jaise hava ki lapak samajhte hain
dikha rahe hain vahi jo pasand hai mujh ko
ki aa.ine mire dil ki kasak samajhte hain
ye bartanon se chhalakti hui udasi hai
jise ham ek badan ki khanak samajhte hain
labon ke zahr ko chakhne ki kya zarurat hai
faqir aankh men phaili chamak samajhte hain
tumhare baad samajhne lage hain sab ‘irshad’
ḳhushi ke za.iqe gham ki mahak samajhte hain
Leave a Reply