sharik-e-ḳhalvat-e-ḳhun-bar thoḌi hota hai
ye shahr gham kaa, nigah-dar thoḌi hota hai
shikast o fat.h ke asbab tai-shuda to nahin
jo ek baar ho, har baar thoḌi hota hai
hai ek vaqt muqarrar, vagarna duniya men
koi zaval pe tayar thoḌi hota hai
fareb-e-da.ava-guzari hai, mas.ala kuchh aur
sabhi ko ishq ka azar thoḌi hota hai
lahu ki taal pe aghaz raqs karte hue
idhar udhar se sarokar thoḌi hota hai
ulaTna chahe jo kar-e-munafiqat ka naqab
ye shahr! is ka taraf-dar thoḌi hota hai
lakiren khinchte rahne se ban ga.i tasvir
koi bhi kaam ho, be-kar thoḌi hota hai
Leave a Reply