jab un se dosti na rahi dushmani rahi
bigḌi to bigḌi aur bani to bani rahi
sadma raha malal raha be-kasi rahi
lekin kisi ki yaad hamesha lagi rahi
kya kahiye dushmani rahi ya dosti rahi
bigḌi to bigḌi aur bani to bani rahi
phir us ko dost jaan raha huun hazar haif
mujh se tamam-umr jise dushmani rahi
pahlu hazar ham ne kiye garche iḳhtiyar
lekin jo us ke dil men Thani thi Thani rahi
a.ina dekhta nahin apne se sharm hai
achchha hua jo mujh se use bad-zani rahi
yusuf ko diin dua.en zuleḳha ne saikḌon
muhtaj ho ga.i bhi to dil ki ghani rahi
ashiq ko ku-e-yar se behtar maqam kya
divana tha jo qais ki ban se bani rahi
tariki-e-mazar to mash.hur baat hai
kuchh ham bhi DhunDh lenge agar raushni rahi
qadr-e-suḳhan ke vaste ab kya karun safi’
daḌhi baḌha.i phir bhi vahi kam-sini rahi
Leave a Reply