Rais Amrohvi
shikva karne se koi shaḳhs ḳhafa hota hai
aur shikva nahin karta to gila hota hai
hashr jis se dil-e-mutrib men bapa hota hai
sirf ik naghma-e-be-saut-o-sada hota hai
niind aati nahin jis raat tujhe ai dil-e-zar
shayad us raat koi jaag raha hota hai
yuun hai vahshat-kada-e-dil men tiri yaad ai dost
jaise sahra men koi phuul khila hota hai
ruh-e-sha.ir se ubharta hai surud-e-abadi
ain us vaqt ki dil Duub raha hota hai
dekh to kaun ḳhud-ara hai pas-e-parda-e-rang
tukma-e-gul to faqat band-e-qaba hota hai
aur baḌh jaati hai kuchh lafz-o-bayan ki tasir
lafz jab ashk ki surat men ada hota hai
gamzan ruuh hui vadi-e-ḳhamoshan men
ḳhatm aḳhir safar-e-koh-e-nida hota hai
Leave a Reply