Iftikhar Arif
ḳhauf ke sail-e-musalsal se nikale mujhe koi
main payambar to nahin huun ki bacha le mujhe koi
apni duniya ke mah-o-mehr sameTe sar-e-sham
kar gaya jada-e-farda ke havale mujhe koi
itni der aur tavaqquf ki ye ankhen bujh jaa.en
kisi be-nur ḳharabe men ujale mujhe koi
kis ko fursat hai ki ta.amir kare az-sar-e-nau
ḳhana-e-ḳhvab ke malbe se nikale mujhe koi
ab kahin ja ke sameTi hai umidon ki bisat
varna ik umr ki zid thi ki sambhale mujhe koi
kya ajab ḳhema-e-jan teri tanaben kaT jaa.en
is se pahle ki havaon men uchhale mujhe koi
kaisi ḳhvahish thi ki socho to hansi aati hai
jaise main chahun usi tarah bana le mujhe koi
teri marzi miri taqdir ki tanha rah ja.un
magar ik aas to de palne vaale mujhe koi
Leave a Reply