Ghulam Murtaza Rahi
mili raah vo ki farar ka na pata chala
uḌa sang se to sharar ka na pata chala
jo khinche khinche mujhe lag rahe the yahan vahan
kisi ek aise hisar ka na pata chala
raha jaate jaate na dekh sakne ka gham hamen
vo ghubar uTha ki savar ka na pata chala
rahi hijr men jo ik ek pal ki ḳhabar mujhe
to visal men shab-e-tar ka na pata chala
ka.i mausamon se talash men hai miri nazar
kisi gulsitan se bahar ka na pata chala
Leave a Reply