taashshuq-lakhnavi

Su-E-Dayar Khanda-Zan Wo Yar-E-Jaani Phir Gaya

su-e-dariya khanda-zan vo yar-e-jani phir gaya

motiyon ki aabru par aaj paani phir gaya

suiyan si kuchh dil-e-vahshi men phir chubhne lagin

thiik hone ko libas-e-arghavani phir gaya

hathkadi bhari hai mere haath ki aaj ai junun

dast-e-janan ka kahin chhalla nishani phir gaya

zor paida kar ki pahunche jeb tak dast-e-junun

ab to mausam ai vafur-e-na-tavani phir gaya

sarfroshan-e-mohabbat se na hogi aankh chaar

munh jo us ki tegh ka ai sakht-jani phir gaya

kahte ho ham aaj mulk-e-husn ke hain badshah

kya huma bala-e-sar ai yar-e-jani phir gaya

kyuun kabutar ke evaz hudhud na laaya khatt-e-shauq

is khata par mujh se vo bilqis-e-sani phir gaya

bosa kaisa ik lab-e-shirin se gaali bhi na di

aaj phir ummid-var-e-mehrbani phir gaya

ai zaifi saaya sar par se gaya dhuup aa gai

fasl badli aftab-e-zindagani phir gaya

gir pade aansu uruj-e-mah-e-kamil dekh kar

miri nazron men tira ahd-e-javani phir gaya

More Poems

Leave a Comment