Charkh Chinioti
machlenge un ke aane pe jazbat sainkaḌon
hans bolne ki hongi hikayat sainkaḌon
mayyat uThane koi bhi aaya na ba.ad-e-marg
sunte the zindagi men miri baat sainkaḌon
tum the to zindagi ka na koi saval tha
ab janm le rahe hain savalat sainkaḌon
kyuun us nigah-e-mast ki sab mangte hain ḳhair
abad aur bhi hain ḳharabat sainkaḌon
chamke jo tere nuur se din-rat the vahi
aane ko yuun to aa.e hain din-rat sainkaḌon
parda-navaz husn ke qurban ja.iye
ik ik hijab men hain hijabat sainkaḌon
vo baat koi bhi na kahega jo ham kahen
tum jo kaho kahenge vahi baat sainkaḌon
karte hain arz-e-vasl pe han-hun aji nahin
ya.ani saval ik hai javabat sainkaḌon
bante hain zindagi ke fasane unhin se ‘charḳh’
vo hain to zindagi ki rivayat sainkaḌon
Leave a Reply