Mahboob Khizan
har baat yahan baat baḌhane ke liye hai
ye umr jo dhoka hai to khane ke liye hai
ye daman-e-hasrat hai vahi ḳhvab-e-gurezan
jo apne liye hai na zamane ke liye hai
utre hue chehre men shikayat hai kisi ki
ruThi hui rangat hai manane ke liye hai
ghafil tiri ankhon ka muqaddar hai andhera
ye farsh to rahon men bichhane ke liye hai
ghabra na sitam se na karam se na ada se
har moḌ yahan raah dikhane ke liye hai
Leave a Reply