Quaiser Khalid
har mauj-e-havadis rakhti hai siine men bhanvar kuchh pinhan bhi
rahte hain muqabil hi akasr ishkal bhi dil men iman bhi
shahron ki chamak ne a.ankhon ko dikhla.e vo manzar jin ke liye
qadron ka taghayyur kya kahiye chhoḌ aa.e zaminen dahqan bhi
har samt larazti chiḳhen hain jalte hue ghunchon, kaliyon ki
puchhe hai zamin-e-gul ham se kya kuchh hai ilaj-e-viran bhi
taḳhliq-e-aja.ib laakh hui fil-asr ye uqda apni jagah
ik harf-e-vafa ki qamat par ye ahd raha hai hairan bhi
thi soch ye manafi, lagne lagi musbat bhi jo na.ara ban ke yahan
azadi-e-nisvan kah kah kar aurat ko kiya hai uryan bhi
is shahar-e-kasafat men aa kar ojhal hue a.ankhon se manzar
vo gaanv ka sabza vo bahr-o-bar vo dhuup vo barq-o-baran bhi
ik ishq men likh likh kar kaaTa har lafz kitab-e-hasti ka
kar Daala usi ne zer-o-zabar jo kaam lage tha asan bhi
gardish men zamana hai har pal ummid pe duniya hai qaa.em
kal jin se the sahme sahme se ham, hain aaj vo larzan larzan bhi
asrar-e-zamana ban ban kar aate hain yahan din raat magar
fitrat ke masa.ib se ab tak haara hai kahan ye insan bhi
ho paa.e kisi ke ham bhi kahan yuun koi hamara bhi na hua
kab Thahri kisi ik par bhi nazar kya chiiz hai shahr-e-ḳhuban bhi
insan ka samajhna hai baqi, anjam ko pahunche hai duniya
ban jaa.e farishta jab chahe ho jaa.e ye akasr haivan bhi
Darta hai dil-e-kam-fahm yahan kya janiye kya ho basti ka
rahte hain ab ahl-e-ulfat ke ham-rah ye nafrat-sazan bhi
aajiz hai ye insan apni hi suna.i pe jab jab ghaur kare
hai farq numayan har ik men phir bhi hai sabhi kuchh yaksan bhi
isbat-e-tafakkur rakhta hai ham tum men tavazun bhi lekin
rishton par paḌi jab barf-ana kaam aa.e na ahd-o-paiman bhi
me.ar-e-adab bhi Thahre sada ho ahl-e-jahan ke lab par bhi
taḳhliq ghazal kar aisi ik ho shaad ki jis par yazdan bhi
mohtat banaya hoga unhen halat ne apne ghar ke hi
ab apne hi ghar men rahte hain ‘ḳhalid’ jo ba-shakl-e-mehman bhi
Leave a Reply