Sirajuddin Zafar
dar-e-mai-ḳhana se divar-e-chaman tak pahunche
ham ghazalon ke ta.aqub men ḳhutan tak pahunche
haath mai-ḳhvaron ke be-qasd uThe the lekin
ittifaqan tire gesu ki shikan tak pahunche
madrase men kahan us zulf ka mauzu-e-jadid
log pahunche to rivayat-e-kuhan tak pahunche
rasta ek tha ham ishq ke divanon ka
qad-o-gesu se chale dar-o-rasan tak pahunche
aa.en ham dast-darazi pe to maiḳhane se
silsila anjuman-e-sarv-o-saman tak pahunche
ik qaba-e-subuk-o-tang men sau sau hain tilism
kya koi husn ke asrar-e-kuhan tak pahunche
aap hi aap jo khul jaa.e tiri zulf-e-daraz
na-gahan be-hunari nuqta-e-fan tak pahunche
ai suḳhan-fahm ham us bazm se aa.e hain jahan
hairat a.ina-e-uslub-e-suḳhan tak pahunche
is tarah shauq-e-ghazalan men ghazal-ḳhvan ho zafar
shohrat-e-mushk-e-ghazal shahr-e-ḳhutan tak pahunche
Leave a Reply