ḳhamosh bhi rah jaa.e aur iz.har bhi kar de
tasvir vo haziq hai jo bimar bhi kar de
ham se to na hogi kabhi is tarah mohabbat
jo had se guzarne pe gunahgar bhi kar de
is baar bhi tavil-e-shab-o-roz na.i hai
mumkin hai vo qaa.il mujhe is baar bhi kar de
aflak-talashi men huun us burj ki ḳhatir
jo mere ḳhazane ko falak paar bhi kar de
ahang-e-tasavvur se jo larzish hai ragon men
us ko mire ḳhame ka sarokar bhi kar de
vo bait jo masdud men rauzan ka sabab hain
un ko gul-e-aveza-e-divar bhi kar de
qirtas pe ‘tafzil’ ravan juue kali-rang
shayad mire lafzon ko mazedar bhi kar de
Leave a Reply