koi kuchh bhi kahta rahe sab ḳhamoshi se sun leta hai
us ne bhi ab gahri gahri sansen lena siikh liya hai
pichhe haTna to chaha tha par aise bhi nahin chaha tha
apni taraf baḌhne ke liye bhi us ki taraf chalna paḌta hai
jab tak ho aur jaise bhi ho duur raho us ki nazron se
itna purana hai ki ye rishta phir se naya bhi ho sakta hai
jaise sab tufan miri sanson se bandhe hon mujh men chhupe hon
dil men kisi Dar ke aate hi zor hava ka baḌh jaata hai
main to fasurda huun hi lekin ashk raqib ki aankh men bhi hain
ek mahaz pe haare hain ham ye rishta kya kam rishta hai
rang men hain saare ghar vaale khanak rahe hain chaa.e ke pyale
duniya jaag chuki hai lekin apna savera nahin hua hai
Leave a Reply