Bakul Dev
chaal apni ada se chalte hain
ham kahan kaj-ravi se Talte hain
zindagi be-ruḳhi se pesh na aa
tujh pe ehsan mire nikalte hain
kardan hain bala ke sab chehre
aa.ine ko hunar se chhalte hain
koi atish-fishan hai siine men
ashk misl-e-sharar nikalte hain
us ke tarz-e-suḳhan ke maare log
apna lahja kahan badalte hain
aaj so luun ki hai suhulat-e-shab
din kahan roz roz Dhalte hain
aa ga.i lau ḳhizan ki parbat tak
vadiyon men chinar jalte hain
panja-e-zehn ke tale paiham
ta.ir-e-dil ka.i machalte hain
ḳhvab ka jin na aa.ega bahar
be-sabab aap aankh malte hain
tujh se kirdar hon ‘bakul’ jin men
aise qisse kahan sambhalte hain
Leave a Reply