manus ho gae hain gham-e-zindagi se ham
ham ko khushi mile to na lenge khushi se ham
phulon ki aarzu na karenge kisi se ham
kante samet laae hain un ki gali se ham
ham sham-e-gham ko sub.h-e-masarrat ka naam den
suraj karen tulua na kyuun tirgi se ham
sach ke liye ham aaj ke suqrat ban gae
piite hain jaam zahr ka apni khushi se ham
ham mil ke khud se khud ko bhi pahchante nahin
apne liye bhi ban gae hain ajnabi se ham
gham khate khate ho gaya manus-e-gham mizaj
ho jaate hain fasurda-o-mahvar khushi se ham
ham ko vatan men ab koi pahchanta nahin
apne vatan men phirte hain ab ajnabi se ham
ban jaaen kyuun na khud hi numud-e-sahar ki zau
‘asi’ ziya talab na karen tirgi se ham
Leave a Reply