ek ne.amat tire mahjur ke haath aa.i hai
iid ka chand charagh-e-shab-e-tanha.i hai
qaid men bas ye koi kah de bahar aa.i hai
phir to main huun miri zanjir hai angḌa.i hai
kitna dilchasp hai allah mira qissa-e-gham
aaj koi nahin kahta mujhe niind aa.i hai
zahr aur zahr ki tasir batane vaale
ab samajh le ki na sauda hai na sauda.i hai
sub.h tak hoga mire ghar pe hujum-e-ḳhilqat
raat ki raat faqat alam-e-tanha.i hai
daman-o-jeb-o-gareban bhi nisar-e-vahshat
ab kisi baat men zillat hai na rusva.i hai
do ghaḌi dil ke bahalne ka sahara bhi gaya
lijiye aaj tasavvur men bhi tanha.i hai
muddaten guzrin hamen ashk bahate ‘manzar’
aaj ḳhud us ne hansaya to hansi aa.i hai
Leave a Reply