koi hamrah nahin raah ki mushkil ke siva
hasil-e-umr bhi kya hai gham-e-hasil ke siva
ek sannaTa musallat tha guzargahon par
zindagi thi bhi kahan kucha-e-qatil ke siva
har qadam hadse har gaam marahil the yahan
apne qadmon men har ik shai rahi manzil ke siva
tha misali jo zamane men samundar ka sukut
kaun tufan uThata raha sahil ke siva
apne markaz se har ik chiiz gurezan nikli
laila har bazm men thi ḳhalvat-e-mahmil ke siva
apni rahon men to ḳhud bo.e hain kanTe us ne
dushman-e-dil ki nahin aur koi dil ke siva
apni taqdir tha barbad-e-mohabbat hona
mahfilen aur bhi thiin aap ki mahfil ke siva
Leave a Reply