abu-bakr-abbad

Jahan Hum Log Rahte Hain

jahan ham log rahte hain

vahan achchhe-bhale likhe-padhe hi log baste hain

imarat-e-ilm aur daulat ki azmat husn ko do-bala karti hai

tabassum muskurahat hi-hello aur ba-zahir khush-dili ki barish hoti hai

ki jis tezi se yaan fashion badalta hai

ghurur-e-husn aur

zehn-o-dil ki sakht bhi tabdil hoti hai

rizalat buzdili aur asbiyat ko yaan

umda kapdon achchhe chehron men chhupate hain

magar jab gaanv jaate hain

vahan ke kachche ghar kheton men baghon men zara aram karte hain

uchhalte-kudte bachchon ko azadi se mard-o-zan ko hanste-bolte jab dekh aate hain

ki har gham aur khushi achchhe bure halat men vo sachche dil se saath rahte hain

na apne zahir-o-batin men koi bhed rakhte hain

jo nafrat hai to nafrat hai mohabbat dil se karte hain

ki man men jo bhi hota hai zaban se saaf kahte hain

magar phir laut kar jab shahr aate hain

amiron alimon aur afsaron ke beach rahte hain

to ye mahsus hota hai

ki ham bimar hain lachar hain tanha aur qallash hain

jahan ham log rahte hain

vahan saare hi aise log baste hain

More Poems

Leave a Comment