Faza Ibn E Faizi
na damanon men yahan ḳhak-e-rahguzar bandho
misal nik.hat-e-gul mahmil-e-safar bandho
is aa.ine men koi aks yuun na ubhrega
nazar se silsila-e-danish-e-nazar bandho
jo sahiban-e-basirat the be-libas hue
fazilaton ki ye dastar kis ke sar bandho
safir-e-jan huun hisar-e-badan men kya Thahrun
chaman-parasto na ḳhushbu ke bal-o-par bandho
na TuuT jaa.e ki nazuk hai rishta-e-anfas
tanab-e-ḳhema-e-hasti sambhal kar bandho
kahan har ek shanavar guhar ba-kaf nikla
samundaron se tavaqqo na is qadar bandho
har ek haath men hai sang sad-hazar-ashob
phir aise vaqt men shaḳhon se kyuun samar bandho
namak chhiḌakte raho ye bhi hai masiha.i
ye kya zaruri ki marham hi zaḳhm par bandho
phire hai kab se pareshan ye zaḳhm-ḳhurda hiran
junun ko dasht se le ja ke apne ghar bandho
gaya vo daur ki jab barf barf the alfaz
girah men ab ye dahakte hue sharar bandho
adab nahin hai rayazi ka mas.ala yaaro
har ek shaḳhs pe kyuun tohmat-e-hunar bandho
ye sinf abru-e-fann-e-sha.iri hai ‘faza’
ghazal kaho to mazamin mo’atabar bandho
Leave a Reply