Ravish Siddiqi
zahr-e-chashm-e-saqi men kuchh ajiib masti hai
gharq kufr o iman hain daur-e-mai-parasti hai
sham.a hai sar-e-mahfil kuchh kaha nahin jaata
shola-e-zaban le kar baat ko tarasti hai
zulf-e-yar ki zad men dair bhi hai kaaba bhi
ye ghaTa jab uThti hai duur tak barasti hai
aaj apni mahfil men hai bala ka sannaTa
dard hai na taskin hai hosh hai na masti hai
kaun ja ke samjha.e ḳhud-parast duniya ko
kya sanam-parasti hai kya ḳhuda-parasti hai
saḳht jan-leva hai sadgi mohabbat ki
zahr ki kasauTi par zindagi ko kasti hai
ham to rah ke dilli men DhunDte hain dilli ko
puchhiye ‘ravish’ kis se kya yahi vo basti hai
Leave a Reply