na intishar ka ḳhatra na inhidam ka hai
ye marhala to tabahi ke iḳhtitam ka hai
jo ḳhatm ho gaya rishta vo dosti ka tha
jo bach gaya hai ta.alluq vo intiqam ka hai
har ek lamha ajab ḳhauf be-panahi ka
hamare ahd men ye rang sub.h-o-sham ka hai
bacha.en kis tarah balva.iyon se basti ko
muhafizon ka irada bhi qatl-e-am ka hai
ye buzdili hai ki bote hain phuul un ke liye
vo jin ke haath men ḳhanjar hamare naam ka hai
safar hai dasht ka aur raat ho ga.i aalam
hamare samne ab mas.ala qayam ka hai
Leave a Reply