mera saaya hai mire saath jahan ja.un main
bebasi tu hi bata ḳhud ko kahan pa.un main
be-ghari mujh se pata puchh rahi hai mera
dar-ba-dar puchhta phirta huun kahan ja.un main
zaḳhm ki baat bhi hoti to koi baat na thi
dil nahin phuul ki har shaḳhs ko dikhla.un main
zindagi kaun se na-karda gunah ki hai saza
ḳhud nahin janta kya auron ko batla.un main
ek hammam men tabdil hui hai duniya
sab hi nange hain kise dekh ke sharma.un main
Leave a Reply