aThon pahr lahu men nahaya kare koi
yuun bhi na apne dard ko dariya kare koi
aḌ ja.egi fasil-e-shab-e-jabr toḌ kar
qaidi nahin hava jise andha kare koi
dil taḳhta-e-gulab bhi atish-fishan bhi hai
is rah-guzar se roz na guzra kare koi
oḌhi hai us ne sard ḳhamoshi misal-e-sang
lafzon ke abshar giraya kare koi
paani ki tarah phail ga.i ghar men sham-e-hijr
ta-sub.h Duub Duub ke ubhra kare koi
main huun kisi sada ke shikanje men ‘ja.afari’
mera pata havaon se puchha kare koi
Leave a Reply