saz-e-alam pe dil naghma-sara hota hai
ai mohabbat ye tire daur men kya hota hai
phail jaati hai fazaon men udasi ki ghaTa
ishq jab husn se ro ro ke juda hota hai
hausla diid ka hargiz na karen ahl-e-nazar
jalva-e-husn bahut hosh-ruba hota hai
vo havas hai jo gila karti hai ranj-o-gham ka
ishq har haal men razi-ba-raza hota hai
un ke mub.ham se isharon ka ta.assur tauba
dil men kya ma.arka-e-yas-o-raja hota hai
ham jo kahte hain use vaqt ka shahkar-e-jamil
baat kuchh bhi nahin lekin vo ḳhafa hota hai
ravish-e-ḳhas pe chalta huun adab men ‘parvez’
mere har sher ka andaz naya hota hai
Leave a Reply