Chahat Tumhaari Sine Pe Kya Gul Katar Gai

Rashid Aazar

chahat tumhari siine pe kya gul katar ga.i

kis ḳhush-saliqagi se jigar chaak kar ga.i

rakkhi thi jo sambhal ke tu ne salamti

vo tere ba.ad kis ko pata kis ke ghar ga.i

jo zindagi sameT ke rakkhi thi aaj tak

ik lamha-e-ḳhafif men yaksar bikhar ga.i

bhaTke hue the aise ki gard-e-safar ko ham

muḌ muḌ ke dekhte rahe manzil guzar ga.i

ik umr dhuup men jo pali thi vo kashmakash

saaya ghane daraḳht ka dekha to Dar ga.i

hairat hai kuchh pata na chala kaise zindagi

jaisi guzarni thi miri vaisi guzar ga.i

ochhon ki tab.a ‘azar’-e-ḳhush-ḳhu se puchhiye

juun hi hava-e-vaqt lagi bas aphar ga.i