jis qadar qalb ki taskin ke saman honge
karb afza-e-sukun-e-gham-e-hijran honge
arsa-e-hashr men jo ishq ka unvan honge
meri hi ḳhaak ke ajza-e-pareshan honge
ashk ma.asum jo ḳhamyaza-e-isyan honge
vo bhi munjumla-e-saramaya-e-iman honge
mere arman to na minnat-kash-e-jan honge
dil se niklenge to vo ghair ke arman honge
kahne-sunne se vo taklif-e-ayadat na karen
isi-e-vaqt hain aa kar bhi pasheman honge
dil men rah rah ke khaTakte jo hain kanTon ki tarah
ghaliban aap ke kho.e hue paikan honge
hasil-e-ishq-o-mohabbat gham-e-hijran na sahi
vo kisi shoḳh ke bhule hue paiman honge
laakh azad sahi hazrat-e-‘talib’ lekin
aap bhi qa.il-e-majburi-e-insan honge
Leave a Reply