Nawaz Asimi
qasam ḳhuda ki bulandi se guftugu karte
uḌaan bharne se pahle agar vuzu karte
fana ka ḳhauf raha raat bhar mohalle par
faqir guzre the kal shaam allah-hu karte
hamare saaye zaminon men dhans chuke the yahan
safar ka azm bhala kaise chaar su karte
kisi pe dhuup ke chilke na Dalte hargiz
ik aa.ina bhi agar ḳhud ke ru-ba-ru karte
jhuki jabin ka me.ayar baḌh gaya hota
gar apne aap ko masjud qibla-ru karte
abhi hui hain kahan pattharon ki barsaten
abhi se phirne lage kyuun lahu lahu karte
jo log mom ki dastar bandhe phirte hai
zara si der to suraj se guftugu karte
kiran ke dhage ka ham ko agar sira milta
hava.en siite ḳhalaon ko ham rafu karte
‘navaz’ is liye ḳhamoshiyon se lipTe hain
zaban khulti to paida na.e adu karte
Leave a Reply