sab ke jalve nazar se guzre hain
vo na jaane kidhar se guzre hain
mauj-e-avaz-e-pa-e-yar ke saath
naghme divar-o-dar se guzre hain
aaj aaya hai apna dhyan hamen
aaj dil ke nagar se guzre hain
ghar ke goshe men the kahin pinhan
jitne sailab ghar se guzre hain
zulf ke ḳham hon ya jahan ke gham
mar miTe ham jidhar se guzre hain
sadaf-e-tah-nashin bhi kaanp gaya
kaise tufan sar se guzre hain
baagh shadab mauj-e-gul hi nahin
sail-e-ḳhun bhi idhar se guzre hain
jab chaḌhi hai kaman kahin ‘abid’
tere mere jigar se guzre hain
Leave a Reply