main chup huun aur duniya sun rahi hai
ḳhamoshi dastanen bun rahi hai
ta.ajjub hai ki ik sone ki chiḌiya
bayabanon men tinke chun rahi hai
kahan neki gunahon se hi bach len
hamen to bas yahi ik dhun rahi hai
tujhe mahsus karte bhi to kaise
chhaTi his bhi hamari sun rahi hai
main us basti ka bashinda tha yarab
jahan sachcha.i bhi avgun rahi hai
yahan gardish men hain din raat ‘anjum’
vahan bas ik sada-e-kun rahi hai
Leave a Reply