Ali Manzoor Hyderabadi
gum unhin main huun un ka dhyan kab nahin aata
yaad unhen bhulane ka koi Dhab nahin aata
zabt-e-girya ki talqin ḳhatm kar bas ai hamdam
baat baat par rona be-sabab nahin aata
kis pe jaan deta huun raaz hi men rahne de
naam us dil-ara ka ta-ba-lab nahin aata
kya kahun use pahle dekhta tha kis Dhab se
jo hasin nazar mujh ko aah ab nahin aata
jitne bada-ḳhvar aa.e talib-e-nashat aa.e
saqiya koi mujh sa haq talab nahin aata
itne ghamgusaron se shaad kya ho vo ghamgin
gham bhi jis ke hisse men sab ka sab nahin aata
teri kam-nigahi ka talab khinch laata hai
samne tire main ḳhud be-sabab nahin aata
rashk-e-ghair ai ‘manzur’ aise vaqt aata hai
dost ke tasavvur men dost jab nahin aata
Leave a Reply