Qamar Jalalvi
is men koi fareb to ai asman nahin
bijli vahan giri hai jahan ashiyan nahin
sayyad main asiir kahun kis se hal-e-dil
sirf ek tu hai vo bhi mira ham-zaban nahin
tum ne diya hamari vafaon ka kya javab
ye ham vahan bata.enge tum ko yahan nahin
sajde jo but-kade men kiye meri kya ḳhata
tum ne kabhi kaha ye mira astan nahin
gum-karda raah ki kahin miTTi na ho ḳharab
gard us taraf uḌi hai jidhar karvan nahin
kyuun sham-e-intizar bujhate ho ai ‘qamar’
naale hain ye kisi ke sahar ki azaan nahin
Leave a Reply