Aziz Bano Darab Wafa
vo ye kah kah ke jalata tha hamesha mujh ko
aur dhundega kahin mere alava mujh ko
kis qadar us ko sarabon ne sataya hoga
duur hi se jo samajhta raha chashma mujh ko
meri ummid ke suraj ko dubo ke har shaam
vo dikhata raha dariya ka tamasha mujh ko
jab kisi raat kabhi baith ke mai-khane men
khud ko bantega to dega mira hissa mujh ko
phir saja dega vo yadon ke ajaib-ghar men
soch kar ahd-e-junun ka koi sikka mujh ko
mere ehsas ke dozakh men sulagne ke liye
chhod dega mire khvabon ka farishta mujh ko
phir ye hoga ki kisi din kahin kho jaega
ik dorahe pe bitha ke mira rasta mujh ko
log kahte hain ki jaadu ki sadak hai maazi
mud ke dekhungi to ho jaega sakta mujh ko
sabz mausam ki inayat ka bharosa bhi nahin
kab uda de ye hava jaan ke patta mujh ko
vaqt hakim hai kisi roz dila hi dega
dil ke sailab-zada shahr pe qabza mujh ko
main na laila huun na rakhta hai vo majnun ka mizaj
us ne chaha hai magar mere alava mujh ko
Leave a Reply