kuchh nahin hasil sipar ko chiir ko ya talvar tod
hai agar taqat to mere ansuon ka taar tod
teri chashm o zulf se sauda-e-ham-chashmi kiya
ai sanam badam-e-chashm-e-ahu-e-tatar tod
zulf men moti pirona mere haq men zahr hai
aaj ai mashshata-e-dandan dahan-e-yar tod
silsila gabr-o-musalman ki adavat ka mita
ai pari be-parda ho kar subha-o-zunnar tod
kibr bhi hai shirk ai zahid muvahhid ke huzur
le ke tesha khaksari ka but-e-pindar tod
ab-e-gauhar se badan ki aab hoti hai kharab
bojh hai ai naznin ye motiyon ka haar tod
sharm kab tak ai pari la haath kar iqrar-e-vasl
apne dil ko sakht kar ke rishta-e-inkar tod
sabr kab tak raah paida ho ki ai dil jaan jaae
ek takkar maar kar sar phod ya divar tod
ai zulekha naqd-e-jan ham den laga tu ganj-e-zar
qimat-e-yusuf ka ho jaae sar-e-bazar tod
vasf-e-chashm-e-yar likhne ke liye ai dast-e-shauq
chal kisi gulshan men shakh-e-nargis-e-bimar tod
chadh ke kothe par dikha de apne abru men shikan
ai pari-paikar halak-e-charkh ki talvar tod
aaina hai mane-e-nazzara-e-husn-o-jamal
ho sake to sadd-e-askandar ko ai dildar tod
mane-e-masti ko bad-masti dikhana chahiye
mohtasib ka shisha-e-dil ai bu-e-mai-khvar tod
husn-e-peshani se qasr-e-charkh ko barbad kar
lauh-e-quran se tilism-e-gumbad-e-davvar tod
naam ko ai dil na rakh asbab-e-islah-e-junun
vadi-e-vahshat men chal kar nashtar-e-har-khar tod
ankhen phod us ki jo dekhe be-ijazat munh tira
shauq se ai mast jam-e-sharbat-e-didar tod
ishq-e-zulf-e-ambar-afshan ka na tuute silsila
paanv ki zanjir ai dast-e-junun sau baar tod
sail-e-bosa hain un ko dekh chashm-e-qahr se
aankh ke Dhelon se ai but khatir-e-aghyar tod
husn-e-gham men ek muddat se muqayyad hai ‘munir’
fikr-e-duniya ka hisar ai haidar-e-karrar tod