dosto tum ne bhi dekhi hai vo surat vo shabih
jo nigahon men sama jaati hai manzar ki tarah
mujh ko ik qatra-e-be-faiz samajh ke na guzar
phail ja.unga kisi roz samundar ki tarah
shahr-ashob men chizon ka koi qaht nahin
zaḳhm milte hain dukanon men gul-e-tar ki tarah
apne hathon ki lakiron men nahin hai shayad
haa.e vo zulf jo khul jaa.e muqaddar ki tarah
mujh se itrao na yaaro ki mujhe hai ma.alum
aap ka ghar ki shikasta hai mire ghar ki tarah
dil ne kuchh ḳhvab to dekhe the magar kya kiije
vo bhi gum ho ga.e talab men patthar ki tarah
Leave a Reply