tum chali jaogi parchhaiyan rah jaengi
kuchh na kuchh husn ki raanaiyan rah jaengi
tum ki us jhiil ke sahil pe mili ho mujh se
jab bhi dekhunga yahin mujh ko nazar aaogi
yaad mitti hai na manzar koi mit sakta hai
duur ja kar bhi tum apne ko yahin paogi
ghul ke rah jaegi jhonkon men badan ki khushbu
zulf ka aks ghataon men rahega sadiyon
phuul chupke se chura lenge labon ki surkhi
ye javan husn fazaon men rahega sadiyon
is dhadakti hui shadab-o-hasin vaadi men
ye na samjho ki zara der ka qissa ho tum
ab hamesha ke liye mere muqaddar ki tarah
in nazaron ke muqaddar ka bhi hissa ho tum
tum chali jaogi parchhaiyan rah jaengi
kuchh na kuchh husn ki raanaiyan rah jaengi