Bijli kaDki Baadal Garja Main KHamosh Raha

Jafar Shirazi

bijli kaḌki badal garja main ḳhamosh raha

is kohram men bhi ai duniya main ḳhamosh raha

sub.h ki chaap ne mujh ko sada di main ne baat na ki

shaam ki chup ne mujh ko pukara main ḳhamosh raha

kitne giit bikherte mausam mere samne aa.e

main tha jaati rut ka saaya main ḳhamosh raha

guzre mere paas se ho kar shor bhare mele

sail-e-havadis tu ne dekha main ḳhamosh raha

kitne paani sar se guzre meri zaban na khuli

sahil sahil dariya dariya main ḳhamosh raha

‘ja.afar’ dekh ke gham barsati zindagiyon ke samay

biit ga.i is dil par kya kya main ḳhamosh raha