Osaama Ameer
ajab ahang tha us shor men bhi ḳharch hui
meri avaz-e-sukut-e-ajabi ḳharch hui
ek hi aan men didar hua baat hui
ḳhvahish-e-vasl sar-e-tur sabhi ḳharch hui
zindagi tere ta.aqub men guzari hui shab
baḌi mushkil se mili aur yunhi ḳharch hui
sub.h tak zulf-e-siyah-rang ka jaadu tha ajab
raat botal men thi jitni bhi bachi ḳharch hui
sub.h uThte hi main kuchh dhuup bharunga in men
ḳhvab dekhen hain to ankhon ki nami ḳharch hui
kitni tah-dar ḳhala hai ye ḳhala ke andar
asman dekh ke nur-e-nazari ḳharch hui
kya hi achchhi thi kala.i men bandhi rahti thi
vaqt ko dekhte rahne se ghaḌi ḳharch hui
baḌi virani sar-e-kucha-e-zulmat hai nasib
aap aa.e hain to thoḌi hi sahi ḳharch hui
Leave a Reply