gesu ko tire ruḳh se baham hone na denge
ham raat ko ḳhurshid men zam hone na denge
ye dard to aram-e-do-alam se siva hai
ai dost tire dard ko kam hone na denge
mafhum badal ja.ega taslim-o-raza ka
ab ham sar-e-taslim ko ḳham hone na denge
sarsar ko sikha.enge latafat ka qarina
phulon pe havaon ke sitam hone na denge
ai katib-e-taqdir hamari bhi raza puchh
yuun nala-e-taqdir raqam hone na denge
jab tak hai dil-e-zar men ik qatra-e-ḳhun bhi
kam-martaba-e-lauh-e-o-qalam hone na denge
jo zinda o hassas buton ki hai amanat
us sajde ko ham nazr-e-haram hone na denge
uTh ja.enge juun bad-e-saba bazm se teri
tujh ko bhi ḳhabar teri qasam hone na denge
lakhon ka sahara hai yahi jam-e-sifalin
saghar ko kabhi saghar-e-jam hone na denge
Leave a Reply