ghubar uḌta raha karvan ruka hi nahin
vo kho gaya to mujhe phir kabhi mila hi nahin
gavah hain mire ghar ke ye bam-o-dar saare
ki tere ba.ad yahan dusra raha hi nahin
na koi dar na daricha na rauzan-o-divar
kahan se aa.e hava koi rasta hi nahin
hazar rang bhare laakh ḳhal-o-ḳhad khinche
sarapa tera mukammal kabhi hua hi nahin
tamam raat ye ankhen talash karti rahin
mira sitara magar asman pe tha hi nahin
main kya karun ye tiri sabz vadiyan le kar
yahan vo phuul jise dil kahin khila hi nahin
‘ziya’ main ḳhud ko ye samjha raha huun barson se
ki ye jahan tire vaste bana hi nahin
Leave a Reply