ta-hadd-e-nazar chandni is tarah khuli hai
jaise tire honTon ki hansi phail ga.i hai
utni hi nigahon ki miri pyaas baḌhi hai
jitni ki tujhe dekh ke taskin hui hai
kahne ko to ḳhvabon men miri umr kaTi hai
lekin mire ḳhvabon ki bahut umr baḌi hai
zulfon pe rukun ya tire ruḳhsar pe Thahrun
jis ja se guzar kijiye ik dhuum machi hai
ik umr to guzri hai tujhe dekhte lekin
jab dekhiye tab baat koi tujh men na.i hai
lauT aaya huun ja ja ke tire dar se ka.i baar
jab teri mohabbat men miri jaan pe bani hai
vo ilm ho ya fan ho koi chiiz ho yaaro
shamil na ho gar husn to har shai men kami hai
pakizgi-e-dil ke siva kuchh nahin firdaus
dozaḳh hai vo dil jis men mohabbat ki kami hai
jis dar ke siva hech thi taḳhliq-e-do-alam
us dar se ‘shahab’ aas bhi ab TuuT ga.i hai
Leave a Reply