Ahmad Javed
nihal-e-vasl nahin sang-bar karne ko
bas ek phuul hai kaafi bahar karne ko
kabhi to apne faqiron ki dil-kushai kar
kai khazane hain tujh par nisar karne ko
ye ek lamhe ki duuri bahut hai mere liye
tamam umr tira intizar karne ko
kashish kare hai vo mahtab dil ko zoron ki
chala ye qatra bhi qulzum nisar karne ko
to phir ye dil hi na le aauun khuub chamka kar
tire jamal ka aina-dar karne ko
qaba-e-marg ho ya rakht-e-zindagi ai dost
mile hain donon mujhe taar taar karne ko
bahut sa kaam diya hai mujhe un ankhon ne
havala-e-dil-e-na-karda-kar karne ko
Leave a Reply