Phir Aa Gai Ek But Pe Tabiat Ko Hua Kya

phir aa gai ik but pe tabiat ko hua kya

talti hi nahin sar se musibat ko hua kya

mahrum phir aaya dar-e-mai-khana se vaaiz

rindan-e-qadah-khvar ki himmat ko hua kya

maqbul-e-dua ho na asar ah-o-fughan men

is daur men tasir-e-mohabbat ko hua kya

is husn-o-latafat pe kya sang-dil aisa

hairat men huun allah ki hikmat ko hua kya

jaage to koi anjuman-e-ghair men shab bhar

aur chhai mire munh pe nadamat ko hua kya

danista naqab ulte hue hain sar-e-bazar

aur us pe ye kahte hain ki khilqat ko hua kya

lo ham to chale kausar o tasnim pe zahid

tum yunhi kahe jaao ki rahmat ko hua kya

‘mail’ nahin kya aur zamane men ilahi

mujh par hi utarti hai ye aafat ko hua kya

Leave a Comment