qamar-gazida nazar se haala kahan se aaya
charagh bujhne ke ba.ad ujala kahan se aaya
nadi men vo aur chand hain ek saath raushan
zamin par asman vaala kahan se aaya
ye ghuncha ghuncha siyah bhanvre ki bosa-ḳhvahi
savad-e-gulshan men ham-nivala kahan se aaya
faza ki aludgi thi pahle hi niim qatil
ye dil men ek aur daagh kaala kahan se aaya
qarib-tar doston se hone ki aarzu men
abhi abhi pusht par ye bhala kahan se aaya
main ḳhvab men bhi tiri gali se nahin guzarta
ye donon talvon men surḳh chhala kahan se aaya
kahan gaya sikka sikka qarun ka ḳhazana
‘zubair’ hathon men ye piyala kahan se aaya
Leave a Reply