main bata.un ishq kya hai ek paiham iztirab
dhimi dhimi aanch kahiye ya musalsal iltihab
raat vo aa.e the chehre se naqab ulTe hue
main to hairan tha nikal aaya kidhar se aftab
dil pe un ke ru-e-raushan ka paḌa hai jab se aks
dil nahin hai balki siine men hai raushan mahtab
un ke divanon ka istiqbal hai dar-o-rasan
khinch gaya jo daar par un ke liye vo kamyab
kya miri hamd-o-sana aur kya mira shukr-o-sipas
un ke ehsan be-shumar aur un ki ne.amat be-hisab
raat ka pichhla pahar tha aur aansu ki jhaḌi
mera dil tha shayad un ki bargah men baryab
ishq ki duniya men aise hadson se kya mafar
aaya qasid ka janaza mere naame ka javab
ye mahal meri tamannaon ka ai ‘ahmad-uruj’
jaise bachchon ka gharaunda jaise divane ka ḳhvab
Leave a Reply