jab tasavvur men koi mah-jabin hota hai
raat hoti hai magar din ka yaqin hota hai
uf vo bedad inayat bhi tasadduq jis par
haa.e vo gham jo masarrat se hasin hota hai
hijr ki raat fusun-kari-e-zulmat mat puchh
sham.a jalti hai magar nuur nahin hota hai
duur tak ham ne jo dekha to ye malum hua
ki vo insan ki rag-e-jan se qarin hota hai
ishq men marka-e-qalb-o-nazar kya kahiye
choT lagti hai kahin dard kahin hota hai
ham ne dekhe hain vo aalam bhi mohabbat men ‘hafiz’
astan ḳhud jahan mushtaq-e-jabin hota hai
Leave a Reply