Rone Lage Hain Log Rulate Hue Mujhe

rone lage haiñ log rulāte hue mujhe

merī hī dāstān sunāte hue mujhe

mere safar ko aur bhī mushkil-zada na kar

yuuñ duur tak na dekh tū jaate hue mujhe

yaaro anā kī jañg meñ aksar yahī huā

vo hārtā gayā hai harāte hue mujhe

ye kaun merī zaat par ehsān kar gayā

ye kaun mar gayā hai bachāte hue mujhe

ik dard aa ke mujh meñ achānak Thahar gayā

royā vo jab gale se lagāte hue mujhe

maiñ bhī thakā huā thā so fauran hī bujh gayā

guzrī thī ye havā bhī bujhāte hue mujhe

Leave a Comment